اسلام آباد انتظامیہ نے دارالحکومت میں دفعہ 144 کے حوالے سے خبردار کردیا

اسلام آباد:

وفاقی دارالحکومت اسلام آباد میں دفعہ 144 نافذ ہونے کے باعث ہر قسم کے اجتماعات اور اکٹھ پر پابندی عائد ہے۔

ضلعی انتظامیہ نے واضح کرتے ہوئے خبردار کیا ہے کہ وفاقی دارالحکومت میں کسی بھی قسم کے اجتماع کی اجازت نہیں دی جائے گی، جبکہ پابندی کی خلاف ورزی کرنے والوں کے خلاف قانون کے مطابق سخت کارروائی عمل میں لائی جائے گی۔

اس حوالے سے شہریوں کو متعلقہ احکامات کی پابندی کرنے کی ہدایت بھی کی گئی ہے۔

اسلام آباد کی ضلعی انتظامیہ کے مطابق وفاقی دارالحکومت میں دفعہ 144 کے علاوہ پیس فل اسمبلی اینڈ پبلک آرڈر ایکٹ 2024 کے تحت بھی اجتماعات پر پابندی عائد ہے۔

انتظامیہ نے خبردار کیا کہ اس ایکٹ کی خلاف ورزی کرنے والوں کو 3 سال قید کی سزا ہو سکتی ہے، اس لیے شہری کسی بھی ایسے اجتماع یا سرگرمی میں شرکت سے گریز کریں جو نافذ قوانین کی خلاف ورزی ہو۔

ضلعی انتظامیہ نے شہریوں سے اپیل کی ہے کہ وہ کسی بھی غیر قانونی سرگرمی کا حصہ نہ بنیں اور شہر میں نافذ پابندیوں کا احترام کریں۔

انتظامیہ نے عوام پر زور دیا کہ وہ ذمہ دار شہری ہونے کا ثبوت دیتے ہوئے سیکیورٹی اداروں کے ساتھ مکمل تعاون کریں۔ خلاف ورزی کی صورت میں متعلقہ افراد کے خلاف قانون کے مطابق سخت کارروائی کی جائے گی۔