فیفا ورلڈکپ: نیمار افتتاحی میچ سے باہر، اگلے میچز میں بھی شرکت مشکوک

برازیل کے اسٹار فٹبالر نیمار انجری کے باعث ورلڈ کپ میں اپنی ٹیم کا پہلا میچ نہیں کھیل سکیں گے۔

برازیل کے ہیڈ کوچ کارلو اینسیلوٹی نے تصدیق کی ہے کہ تجربہ کار فارورڈ مراکش کے خلاف ہفتے کو ہونے والے افتتاحی مقابلے کے لیے دستیاب نہیں ہوں گے۔

34 سالہ نیمار گزشتہ کچھ عرصے سے پنڈلی کی تکلیف میں مبتلا ہیں اور تاحال مکمل ٹریننگ کا آغاز نہیں کر سکے ہیں۔

اینسیلوٹی کے مطابق نیمار کا ری ہیب جاری ہے اور توقع کی جا رہی ہے کہ وہ آئندہ ہفتے ٹیم کے ساتھ باقاعدہ تربیت میں شامل ہو جائیں گے۔

اس صورتحال کے باعث 20 جون کو ہیٹی کے خلاف میچ میں بھی ان کی شرکت غیر یقینی دکھائی دے رہی ہے۔

برازیلی کوچ نے کہا کہ نیمار جلد از جلد فٹ ہونے کے لیے سخت محنت کر رہے ہیں۔

انہوں نے مزید کہا کہ نیمار کی اہمیت صرف ان کی فنی صلاحیتوں تک محدود نہیں بلکہ ان کا تجربہ اور نوجوان کھلاڑیوں کے لیے مثالی کردار بھی ٹیم کے لیے انتہائی قیمتی ہے۔

نیمار 2023 کے بعد سے قومی ٹیم کے لیے میدان میں نظر نہیں آئے تاہم انہیں ورلڈ کپ اسکواڈ میں شامل کیا گیا۔

برازیل کے ریکارڈ گول اسکورر نیمار 128 بین الاقوامی میچوں میں 79 گول کر چکے ہیں اور یہ ان کا چوتھا ورلڈ کپ ہو سکتا ہے۔