ایران کی قومی فٹبال ٹیم کو فیفا ورلڈ کپ2026 میں شرکت کے لیے تاحال امریکی ویزے جاری نہ ہو سکے جس کے باعث ٹورنامنٹ سے قبل غیر یقینی صورتحال برقرار ہے۔
ایرانی فٹبال فیڈریشن کے سربراہ مہدی تاج نے کہا ہے کہ فیفا کے ساتھ جلد ایک اہم اجلاس متوقع ہے جس میں ویزا معاملات اور سیکیورٹی ضمانتوں پر بات کی جائے گی۔ ان کا کہنا تھا کہ ابھی تک ایرانی ٹیم کے کسی کھلاڑی یا آفیشل کو امریکی ویزا جاری ہونے کی تصدیق نہیں ہوسکی۔
رپورٹس کے مطابق ایرانی کھلاڑیوں کو ویزا پراسیس کے لیے ترکیہ کے دارالحکومت انقرہ میں بائیومیٹرک اور فنگر پرنٹنگ مراحل سے گزرنا پڑ سکتا ہے، تاہم ایرانی حکام کوشش کر رہے ہیں کہ یہ عمل انطالیہ میں مکمل ہو جائے تاکہ ٹیم کو اضافی سفر نہ کرنا پڑے۔
دوسری جانب تہران میں قومی ٹیم کے اعزاز میں الوداعی تقریب بھی منعقد کی گئی جہاں ہزاروں شائقین نے ٹیم کا بھرپور استقبال کیا۔ تقریب میں ورلڈ کپ کے لیے نئی کٹ کی رونمائی بھی کی گئی۔
واضح رہے کہ 2026 فیفا ورلڈ کپ امریکا، کینیڈا اور میکسیکو میں مشترکہ طور پر منعقد ہوگا جبکہ ایران کو اپنے گروپ میچز امریکا میں کھیلنے ہیں۔ ایران اور امریکا کے درمیان کشیدہ سیاسی تعلقات اور حالیہ علاقائی تنازعات کے باعث ایرانی ٹیم کی شرکت سے متعلق خدشات مسلسل سامنے آ رہے ہیں۔
Leave a Reply