گوگل کیلئے بری خبر، عدالت نے اپیل مسترد کر دی

یورپی عدالتِ انصاف نے ٹیکنالوجی کمپنی گوگل پر 2018 میں عائد کیے گئے 4.1 ارب یورو جرمانے کے خلاف کمپنی کی آخری اپیل مسترد کر دی۔

یہ ریکارڈ جرمانہ یورپی کمیشن نے 2018 میں گوگل پر عائد کیا تھا۔ کمیشن کے مطابق گوگل نے اپنے اینڈرائیڈ آپریٹنگ سسٹم کی مارکیٹ میں برتری کا ناجائز فائدہ اٹھاتے ہوئے موبائل فون بنانے والی کمپنیوں کو گوگل سرچ، کروم اور گوگل پلے اسٹور پہلے سے انسٹال کرنے کا پابند بنایا، جس سے حریف سرچ انجنز، براؤزرز اور اینڈرائیڈ پر مبنی دیگر پلیٹ فارمز کے لیے مقابلہ کرنا مشکل ہو گیا۔

گوگل نے عدالت میں مؤقف اختیار کیا کہ یہ فیصلہ اینڈرائیڈ کو کھلا، باہمی مطابقت رکھنے والا اور مفت پلیٹ فارم برقرار رکھنے کے لیے کمپنی کی سرمایہ کاری کو نظر انداز کرتا ہے۔

کمپنی نے اس جرمانے کے خلاف متعدد بار اپیلیں دائر کیں۔

تاہم، 2022 میں ایک نچلی یورپی عدالت نے جرمانہ 4.34 ارب یورو سے کم کرکے 4.1 ارب یورو کر دیا تھا۔ اب یورپی عدالتِ انصاف کی جانب سے آخری اپیل مسترد ہونے کے بعد گوگل کے لیے اس فیصلے کو مزید چیلنج کرنے کی گنجائش تقریباً ختم ہو گئی ہے۔