کارتک آریان ایکشن سین کی شوٹنگ کے دوران شدید زخمی، سرجری کا امکان

بالی ووڈ کے معروف اداکار کارتک آریان فلم کی شوٹنگ کے دوران ایک ایکشن منظر کی عکس بندی کرتے ہوئے شدید زخمی ہوگئے، جس کے بعد انہیں اسپتال منتقل کردیا گیا۔

بھارتی میڈیا رپورٹس کے مطابق کارتک آریان اس وقت اسپتال میں زیرِعلاج ہیں، جہاں ان کے گھٹنے کی سرجری متوقع بتائی جارہی ہے۔ تاہم اداکار کی موجودہ صحت اور چوٹ کی نوعیت سے متعلق مزید تفصیلات سامنے نہیں آسکیں، جبکہ ان کی ٹیم نے بھی تاحال کوئی باضابطہ بیان جاری نہیں کیا۔

کارتک آریان کی انجری کے باعث ان کے پہلے سے مصروف شیڈول میں بھی عارضی وقفہ آنے کا امکان ہے۔ اداکار اس وقت کئی اہم منصوبوں پر کام کر رہے ہیں اور ان کی صحت یابی آئندہ سرگرمیوں کے لیے اہم ہوگی۔

اداکاری کے ساتھ کارتک آریان نے پروڈکشن کے میدان میں بھی قدم آگے بڑھایا ہے۔ وہ ہدایت کار کبیر خان کے ساتھ اپنے اگلے منصوبے میں بطور پروڈیوسر کام کر رہے ہیں۔ دونوں کا یہ مشترکہ طور پر دوسرا پروجیکٹ ہے۔ دوسری جانب کارتک آریان کے مداح انہیں ہدایت کار مِرگھدیپ سنگھ لمبا کی فلم ’ناگزیلا‘ میں بھی دیکھ سکیں گے۔ فلم ان کے آنے والے اہم منصوبوں میں شامل ہے۔

فی الحال مداحوں کی توجہ کارتک آریان کی صحت یابی پر مرکوز ہے، تاہم ان کی ٹیم کی جانب سے چوٹ یا سرجری کے حوالے سے باضابطہ تفصیلات سامنے آنے کے بعد ہی صورتحال واضح ہوسکے گی۔