پیٹرولیم لیوی کے خاتمے کا مطالبہ؛ وزیراعظم، حافظ نعیم سےملاقات کے خواہاں ہیں، رانا ثنا

اسلام آباد:

وزیراعظم کے مشیر رانا ثنا اللہ نے کہا ہے کہ شہباز شریف ، امیر جماعت اسلامی حافظ نعیم الرحمن سے ملاقات کرنا چاہتے ہیں۔

رانا ثنا اللہ کی جانب سے جماعت اسلامی کے نائب امیر لیاقت بلوچ کو آج فون کیا گیا، جس میں پیٹرولیم لیوی سے متعلق مذاکرات کے حوالے سے بات چیت کی گئی۔ اس موقع پر آئندہ پیش رفت سے متعلق بھی گفتگو ہوئی۔

رانا ثناء اللہ نے لیاقت بلوچ سے بات کرتے ہوئے کہا کہ وزیراعظم شہباز شریف اپنے وعدے کے مطابق جماعت اسلامی کے امیر حافظ نعیم الرحمن سے ملاقات کرنا چاہتے ہیں۔

دریں اثنا وزیراعظم اور امیر جماعت اسلامی کی ملاقات سے قبل مذاکراتی کمیٹیوں کے اجلاس کا امکان ہے۔  ان اجلاسوں میں پیٹرولیم لیوی کے خاتمے کے لیے واضح ایجنڈے اور نکات پر بات چیت کی جائے گی تاکہ معاملے پر پیش رفت کی راہ ہموار ہو سکے۔

لیاقت بلوچ نے کہا ہے کہ پیٹرولیم لیوی کا خاتمہ عوام کے لیے حقیقی ریلیف ثابت ہوگا۔ انہوں نے کہا کہ وزیراعظم کی درخواست پر سپر لانگ مارچ میں وقفہ کیا گیا تھا، تاہم لیوی کے خلاف جلسوں اور محضرناموں پر عوامی دستخطی مہم بدستور جاری ہے۔

لیاقت بلوچ کا کہنا تھا کہ جماعت اسلامی اس وقت تک اپنی تحریک جاری رکھے گی جب تک عوام کے لیے بڑا ریلیف پیکیج حاصل نہیں کر لیا جاتا۔ انہوں نے پیٹرولیم لیوی کے خاتمے کو عوامی ریلیف سے جوڑتے ہوئے واضح کیا کہ مطالبات کی تکمیل تک احتجاجی سرگرمیاں جاری رہیں گی۔