کوئٹہ، ینگ ڈاکٹرز کے احتجاج پر سخت ایکشن، 23 ڈاکٹر معطل، 25 افسران کو شوکاز نوٹسز

کوئٹہ:

بلوچستان کے محکمہ صحت نے نوجوان ڈاکٹروں کے احتجاج اور ہڑتال کو سخت جواب دیتے ہوئے بڑا ایکشن لے لیا ہے۔

محکمہ نے قواعد و ضوابط کی خلاف ورزی، غیر قانونی ہڑتال، خلافِ ضابطہ سرگرمیوں اور محکمہ جاتی نظم و ضبط کی پامالی کے الزام میں 23 ڈاکٹروں کو معطل کر دیا ہے جبکہ 25 افسران کو شوکاز نوٹس جاری کر دیے گئے ہیں۔

محکمہ صحت بلوچستان کے ترجمان کے مطابق پوسٹ گریجویٹ تربیتی پروگرام سے وابستہ 5 ٹرینی ڈاکٹروں کی رجسٹریشن بھی فوری طور پر معطل کر دی گئی ہے اور ان کے خلاف باضابطہ انکوائری کا آغاز کر دیا گیا ہے۔

یہ اقدامات صوبے بھر میں سرکاری ہسپتالوں میں مریضوں کی سہولیات متاثر ہونے کے خدشات کے پیش نظر اٹھائے گئے ہیں۔سرکاری ہسپتال کھلے رہیں گے، غیر حاضر ملازمین پر کارروائی محکمہ صحت نے واضح پیغام دیا ہے کہ بلوچستان کے تمام سرکاری صحت کے ادارے مکمل طور پر کھلے رہیں گے۔

لازمی سروسز (ایمریجنسی، آئی سی یو، آپریشن تھیٹر وغیرہ) سے غیر حاضر رہنے والے ملازمین کے خلاف فوری تادیبی کارروائی کی جائے گی۔

محکمہ نے تمام ڈاکٹروں اور پیرامیڈیکل سٹاف کو ہدایت کی ہے کہ وہ اپنے فرائض منصبی بخوبی انجام دیں، ورنہ سخت قانونی اقدامات کا سامنا کرنا پڑے گا۔