ڈنمارک نے دمشق میں 14 سال بعد اپنا سفارت خانہ دوبارہ کھول لیا

 ڈنمارک نے دمشق میں اپنا سفارت خانہ دوبارہ کھول دیا جو تقریباً 14 سال سے بند تھا۔افتتاح ڈنمارک کے وزیرِ خارجہ لارس لوکے راسموسن اور شام کے وزیرِ خارجہ اسعد الشیبانی کی موجودگی میں ہوا۔

ڈنمارک نے شام میں اپنا پہلا مستقل سفیر 2012 کے بعد تعینات کیا ہے۔ راسموسن نے شام کی بحالی، استحکام اور پناہ گزینوں کی واپسی کے لیے مزید 76 ملین ڈالر کی امداد کا اعلان کیا۔

یکم ستمبر کو دونوں ممالک نے دوطرفہ شراکت داری کے معاہدے کی تیاری اور دمشق-کوپن ہیگن کے درمیان براہِ راست پروازیں 21 ستمبر سے شروع کرنے کا بھی اعلان کیا۔ ڈنمارک کے مطابق سفارت خانہ دوبارہ کھولنے کا مقصد شام کی تعمیرِ نو میں کردار ادا کرنا اور دمشق کے ساتھ سفارتی تعلقات مضبوط کرنا ہے۔ یہ شام اور یورپی ممالک کے درمیان سفارتی تعلقات کی بحالی کے سلسلے میں ایک اہم پیش رفت ہے۔