نصف صدی تک صحافت کی خدمت کرنے والے بزرگ صحافی سید خلیل الرحمان انتقال کر گئے

کوئٹہ: روزنامہ جنگ کوئٹہ کے چیئرمین ایڈیٹوریل کمیٹی اور بلوچستان کی صحافت کے سینئر و بزرگ صحافی سید خلیل الرحمان علالت کے باعث انتقال کر گئے۔ ان کے انتقال سے بلوچستان کی صحافتی برادری ایک بااصول، تجربہ کار اور مخلص صحافی سے محروم ہوگئی۔
سید خلیل الرحمان نے نصف صدی سے زائد عرصے تک اخباری صنعت اور صحافت کی خدمت کی۔ وہ طویل عرصے تک روزنامہ جنگ کوئٹہ سے وابستہ رہے اور ادارے میں مختلف اہم ذمہ داریاں احسن انداز میں نبھائیں۔ انہوں نے کوئٹہ پریس کلب اور بلوچستان یونین آف جرنلسٹس کی سرگرمیوں میں بھی بھرپور کردار ادا کیا اور صحافی برادری کے حقوق اور فلاح و بہبود کے لیے ہمیشہ سرگرم رہے۔ ان کی طویل صحافتی خدمات اور پیشہ ورانہ کردار کو بلوچستان کی صحافتی تاریخ میں قدر و احترام سے یاد رکھا جائے گا۔
مرحوم حاجی سید سمیع الرحمان، حاجی سید شفیق الرحمان، سید نجم الثاقب، سید بہادر شاہ، سید احمد علی اور سید رضوان الرحمان کے بھائی، منصور علی اور مبشر علی کے برادرِ نسبتی، سید طیب خلیل اور سید سلمان خلیل کے والد جبکہ سید کامران سمیع اور سید عبداللہ سمیع کے تایا تھے۔
مرحوم کی نمازِ جنازہ اور تدفین بدھ 9 ستمبر کو صبح 9 بجے ای ایم ای سیکٹر، ای بلاک لاہور میں ہوگی، جبکہ فاتحہ خوانی بدھ 9 ستمبر سے ان کی رہائش گاہ پٹیل روڈ کوئٹہ، یاسین ہسپتال کے قریب ملحقہ گلی میں ہوگی۔
سید خلیل الرحمان کا انتقال نہ صرف ان کے اہلِ خانہ بلکہ بلوچستان کی پوری صحافتی برادری کے لیے ایک بڑا صدمہ ہے۔ ان کی صحافتی خدمات، اصول پسندی اور صحافیوں کی فلاح کے لیے کی جانے والی جدوجہد طویل عرصے تک یاد رکھی جائے گی۔