پاکستان نے پہلی بار امریکا سے 60 لاکھ بیرل تیل درآمد کیا ہے، وفاقی وزیر

وفاقی وزیر پیٹرولیم علی پرویز ملک نے کہا ہے کہ پاکستان نے امریکا سے پہلی بار 60 لاکھ بیرل خام تیل درآمد کیا ہے جبکہ پاکستان میں تیل و گیس کی تلاش اور معدنیات کے شعبے میں مشترکہ کام کے مواقع ہیں۔

وفاقی وزیر پیٹرولیم علی پرویز ملک سے امریکی معاون وزیر خارجہ ایس پال کپور نے ملاقات کی اور اس موقع پر امریکی ناظم الامور سفیر نیتالی بیکر بھی موجود تھیں۔

وفاقی وزیر پیٹرولیم اور امریکی معاون وزیرخارجہ کی ملاقات کے بعد جاری اعلامیے میں بتایا گیا کہ وفاقی وزیر علی پرویز ملک نے توانائی کے شعبے میں اصلاحات سے آگاہ کیا جہاں پیٹرولیم اور توانائی کے شعبوں میں تعاون کے مزید مواقع تلاش کرنے پراتفاق کیا گیا۔

امریکی معاون وزیرخارجہ نے کہا کہ پاکستان اور امریکا ہمیشہ ایک دوسرے کے لیے اہم رہے ہیں اور تعلقات کی حالیہ گرم جوشی کو مضبوط اقتصادی شراکت داری میں بدلا جا سکتا ہے۔

وفاقی وزیر علی پرویز ملک نے کہا کہ پہلی بار پاکستان نے امریکا سے 60 لاکھ بیرل خام تیل درآمد کیا ہے۔

پاکستان میں توانائی کے شعبے میں اصلاحات کے حوالے سے انہوں نے کہا کہ توانائی اصلاحات کا مقصد مقامی وسائل پر انحصار، کارکردگی میں بہتری اور غیر ملکی سرمایہ کاری کے لیے سازگار ماحول پیدا کرنا ہے۔

انہوں نے کہا کہ بندرگاہی انفرا اسٹرکچر، اسٹوریج سہولیات اور ریفائنری اپ گریڈیشن میں تعاون کے امکانات موجود ہیں، تیل اور گیس کی تلاش اور معدنیات کے شعبے میں بھی مشترکہ کام کے مواقع ہیں۔

علی پرویز ملک نے کہا کہ پاکستان اور امریکی قیادت کے درمیان قریبی تعلقات تعاون کے فروغ کے لیے مضبوط بنیاد ہیں۔

اعلامیے میں بتایا گیا کہ دونوں ممالک کے عہدیداروں کی جانب سے ادارہ جاتی و تکنیکی صلاحیتوں میں اضافے کے لیے کیپیسٹی بلڈنگ تعاون پر زور دیا گیا اور مشترکہ دلچسپی کے شعبوں میں قریبی رابطہ اور دوطرفہ تعاون مزید بڑھانے کے عزم کا اظہار کیا گیا۔